【深惠開荒】蓮塘龍崗交通地獄實錄：原本想 Chill 住入多祝，最後變咗地鐵安檢「以身試毒」？
好多人覺得去惠州，喺香港有直通巴「傳送」過去。可惜香港直通巴係去嘅惠州係惠城，我地要去嘅係惠東，如果惠城過去，要走回頭路，再唔係就要去羅湖汽車站。既然都要轉車，不如去最近東部嘅羅湖區--蓮塘口岸。點知呢場實驗，變咗一場「意志與地理」嘅大混戰。
1. 豪華開局：用平價「套利」豪華巴士
朝早 09:40 喺荃灣去蓮塘口岸，除咗搭巴士轉巴士之外，都可以搭直通車，對比都係口岸直通巴，去皇崗要$48，蓮塘只需$29，都算幾抵搭，所以最好去網上旅遊平台買定飛。今次去HopeGoo買車票，用到佢個優惠，只需$19，即刻更抵。
09:40上車，坐住旅遊巴張沙發位，最10:21 準時落地蓮塘（香園圍），心諗今日一定超早到……
2. 行政荒謬：檸檬茶嘅「安檢儀式」
落地蓮塘，發現蓮塘口岸大巴站，只係關口一個小型停站點之後，第一時間入商場。
買咗杯手打檸檬茶諗住 chill 下，然後去龍崗轉長途大巴，點知一入地鐵站就出事。安檢人員指住杯茶，要我「當面飲一啖」證明安全先放行。呢一啖唔係因為口渴，係為咗「獲取通行權」。忍住份無奈，我帶住呢杯「開咗光」嘅茶，開始咗長達一個鐘嘅地鐵大長征。
3. 交通崩潰：消失嘅巴士與地鐵迷航
原來資訊已經改晒，原本想搭嘅快線巴士消失咗。我被迫喺地底盲目移動。
喺轉到氣咳嘅時候，好彩 3 號線衝上高架段，見到窗外嘅風景，感到非常舒服。
南聯站落車嘅時間，我先至可以啜第二啖檸檬茶。嗰陣時，已經係我離開蓮塘一個鐘之後嘅事。
4. 地理陷阱：正規空殼嘅「龍崗汽車總站」
12:12 踏出南聯站，高德地圖帶我行路好順利，一直都係一條大直路，直到轉入一條窄路，因為入口太難搵，我行過龍誤闖咗車站站場，意外影到幾架準備開出嘅大巴，證明呢個車站係存在嘅。
因為唔知道實際位置，所以繼續向前兜圈，後來發現其實係巴士嘅後面。返到去嗰座外表「正規」嘅客運大樓，入面冷清到極致。售票員問一句「去哪裡？」，證實無車入惠東，直接宣告咗我路面實驗嘅失敗。呢個夾喺地鐵站中間嘅「長途車站」，竟然唔係邊度都有得去。
5. 止蝕突圍：¥207 買斷尊嚴
13:00 決定「熔斷」， 出返大路 Call 車止蝕。
點知接單嘅係部「粵 L」惠州車，個司機一上車就拋句：「你剛剛大巴票買不到嗎？那邊很偏很偏沒有大巴到的。別給平台賺喇，直接取消訂單，平台寫多少，給我付多少就好。」
既然佢扮好人，我亦都配合演出，「應承」取消訂單，因為呢場係一場過客嘅博弈。我心入面即刻精算：高德估價 ¥164，佢最後要 ¥200（話包埋高速費）。雖然高德本身有「乘客自付高速」嘅規矩，但既然你叫我取消單，你自己已經袋埋原本要畀平台嗰筆佣金，理應要免收我高速費。佢而家收夠我 ¥200，擺明係「得便宜賣乖」兼「兩頭食」。
為咗趕死線，我表面上選擇咗「買斷尊嚴」——忍氣吞聲先畀錢，但其實我一上車就喺背後一路行、一路向平台投訴，最終我得到永久屏蔽司機嘅保護，而司機就要「線下培訓學習」、「扣 6-12 分」、「限制接單 1-30 天」以及「罰款 100 元」。當時我根本無去諗平台最後會點處置佢，係封號定要佢返去培訓？呢啲都唔係重點。重點係作為過客，我必須要行使我嘅投訴權。
最終全日交通費加埋係 ¥207（地鐵+網約車）。雖然噴咗錢，但保住咗港人「過客」嘅底線：錢可以畀你賺，但唔代表你可以隨便恰。
6. 終於到達
最終 14:17 抵達多祝。雖然遲咗到，但當踏入呢個香港人極少去嘅鄉下地方，嗰份陰雨天特有嘅寧靜，令我知道之前嘅折騰都係值得嘅。呢度等緊我嘅，係未知嘅風景、未被修飾嘅街道，仲有嗰份屬於「過客」嘅放鬆。
留言
張貼留言